節目夥伴
八至九十年代初嘅香港電影,除咗笑餐飽、打餐飽之外,寫愛情,甚至愛慾,其實同樣拿手、熟練。同如今嚮往素雅嘅文青風,又或者以議題為主嘅創作方向相比,當時嘅港產片,不單止口味重,題材若涉及社會狀況,比較多係圍繞反權威方向寫,而少直接提公義嘅界限。
嗰陣為咗得到顯著嘅戲劇效果,就算單講愛與被愛嘅戲,好多時亦會不擇手段推高人性嘅矛盾嚟增加衝突。呢段時間,雖然每部戲都有企理衣著、美術幫補,但裡面嘅思想同價值觀,依然係娛樂基層為主。最經典例子,莫過於講富家女愛上古惑仔嘅《天若有情》(1990),裡面苦心經營嘅悲劇感,實際上係透過描寫階級上嘅落差而嚟。觀眾當然清楚男主角要死,而佢嘅局限(自卑)就係要靠宿命嚟解除,從而提升至成為女主角永恆嘅回憶。用今日講法,呢啲戲太dram(dramatic)啦。不過,矛盾唔夠大,衝突唔夠強,隱藏起嘅幽微人性,就好難被勾起,浮現出嚟。
比如講,我哋可以喺林嶺東導演嘅《愛神一號》,睇到主角葉倩文、鄭浩南之間,嗰種近乎由虐待建立嘅關係。尤其是互相掌摑一幕,於我,雖未至於係童年陰影,但「世界上竟然有咁嘅事」呢種疑惑,一直盤據腦海。另外,無獨有偶,《我為你狂》早一年推出,同樣寫傷害同控制慾,不過更多係講虧欠,一筆無彎轉嘅孽債。導演金炳興書卷味多啲,情慾方面刻劃,想像力較豐富。《亡命鴛鴦》走奇情路線。導演張堅庭揉合謀殺、背叛、毒品交易等,寫冷艷殺手遇上倒楣差人。佢哋究竟點樣喺絕境之中搵出路,甚至從敵人變成戀人呢?至於《歡樂叮噹》,笑匠許冠文借鑑《熱情如火Some Like It Hot》故事,飾演男扮女裝混入女團避難嘅樂手。部戲除咗董驃、許冠英、黃韻詩等搞笑高手之外,鐘楚紅演嘅叮叮,集性感與純真於一身,誘惑力十足(呢種人物,喺近年政治正確嘅議題底下,差不多完全絕跡)。而《何日君再來》以大時代作背景。梅艷芳所演嘅歌女,活喺國家與個人感情嘅動盪裡面,既矛盾又難以自拔。究竟應該選擇愛情定係恩情,呢個結糾纏埋一齊,根本無法解開。
順帶一提,「香港女兒」喺《歡樂叮噹》有客串性嘅演出,唱起《夢幻的擁抱》變奏版,相當抵死,不容錯過。
馮慶強
「大館石階影院 – 你(妳)令我瘋狂」(2023年1月至2月) 策劃
日期 |
播放電影 |
08.01.2023 |
《何日君再來》(1991) |
15.01.2023 |
《亡命鴛鴦》(1988) |
29.01.2023 |
《歡樂叮噹》(1986) |
05.02.2023 |
《愛神一號》(1985) |
12.02.2023 |
《我為你狂》(1984) |